මම රජවුනොත්

මම රජ වුනොත් ගෙවි ගෙවි යන තරුණ     යුගේ

කලයුතු දේ ගොඩක් ගැන අද හිතට            නැගේ

පෙන්නා බලය තේජස තද ගුණය                  මගේ

මෙි රට ගොඩනගන්නෙමි වසරකදි               වගේ

පළමුව මුදල් සහ බලයම පසු                     පස්සේ

යන නායකයො අල්ලාගෙන හැම               තිස්සේ

ටොකු ඇන ඇනද  හිස හප්පා උළු              වස්සේ

ගහනව පොදි බැඳල සක්වල ගල               අස්සේ

ටෙලි විෂනයේ යන ඇඩ් වල මිලට                  හිඳ

පොඩි දරුවන්ට තව වස විස කවන                 සඳ

අල්ලාගෙන සැවොම එක මිටියකට               බැඳ

තොල් පටි දෙක මහමි ඇල දිව පිටට              ඇද

ඉස්තිරි දූෂණය කල වුන් කොහෙද                කියා

ගම රට පීර පීරා හරි ගනිමි                          සොයා

මහිලා සමිතිවල නීතිය කරනු                        නියා

ගජමුතු දෙක තලන්නෙමි ගල් උඩක            තියා

ජීවත් වෙන්නෙ දැන් දැන් අමුතු                 රටකය

බණ පද රැකුනෙ චීවර දරපු කට                    කය

අණ කර කැඳවමින් සඟ ඝණයෙ           කුලකය

දස වසරක්ම  කියවම් විනය                     පිටකය

ගිජුවුන මත්පැනට සහ කුඩු වලට                පවා

ජාවාරමුන් එක්කර එක තැනක                 හොවා

යනතුරු මාසයක් දිගටම උදය                        හවා

ඇස් දෙක බැඳල ගස්සන්නෙමි ගැහැණු       ලවා

උස්තැන් දැකල කොඳු නවමින් දෙක          තුනට 

පොඩි තැන් වලට ගොරවන පුප්පන         තැනට

පිළියම් විලස වැඩ කරණට එක                  අණට

සළු පිළි අන්දවමි නීතියෙ                     දෙවඟනට

පරිසර හානි කල වුන් ගැන මතක                මකා

නොදමමි ඉවත ඒවා සුළු ලෙසට                  තකා

රැස්කර කැලයකට ඇතිවන විලස                 දුකා

එක පේලියට තබමින් ගස්සවමි               කොකා

ඇති කරවන්න සංහිඳියා කියන                      එක

පන්සල් පල්ලි කෝවිල් ගත යුතුය                  රැක

පහකර දමා දර්මය ගැන සියළු                      සැක

දවසට වරක් පන්සල් වෙත යැවිය                 හැක

මහලුව සිටින මව් පිය මඩමකට                    යවා

සහ වැඩිහිටි අයට නිතරම බලන                   රවා

විමසා කරුණු උන්ගෙන් ගිරි කුලක            හොවා

ඇස්දෙක උගුල්වමි ගිජු ලිහිණියෙකු             ලවා

හොර මැර කම් කරන බොරු පතුරන          උන්ට

බොරුවට රජයෙ පඩි කන                සේවකයින්ට

අල්ලස් ගන්න දත කන හැම                  මිනිසුන්ට

සතියක් තලමි ඉලපතකින්,  උන                  ගන්ට

මග අනතුරු වලට මෙහෙයුම් දියත්           කොට

කලයුතු දේ කරල දුක නෑ මළත්                     හෙට

මහජනතාව වෙත ඒ ගැන මතක්                කොට 

අවසර දෙන්නෙ සයිකලයට                කරත්තෙට

තව රජ කෙනෙකු නොව ලෝකය          හිනැස්සූ

මට සම්පතයි මගෙ අතවැසි                     මිනිස්සූ

දඬුවම් වලින් මුලු ලෝකෙම                    තිගැස්සූ

ගඩොලක් වගෙයි හරි ගානට                    පිලිස්සූ

රුවින් පමුදිත යද්දෙහිආරච්චි

2021.03.16