෴අම්මෙි෴
==========
නම ටිකිරාය ගම නොදනිමි මම තාමත්
නිතරම කරන්නෙමි නුඹ ගැන විමසීමත්
කවදාහරිම හමු නූනත් හමුවූවත්
දුක හිතුනාට තරහක් නෑ කවදාවත්
බඩගිනි කියන එක හොඳටම හැඳින්නෙමී
ඒ හැම වෙලාවෙම නුඹෙ රුව දකින්නෙමී
උනනා කඳුලු වැල් දෑතින් පිසින්නෙමී
තනිකම "අම්ම" යන වචනෙන් මනින්නෙමී
අදටත් ඇතිය නුඹ, නොදනිමි තරුණ වියේ
නොදුටුව මූන එනමුත් හිත ඇඳිල තියේ
හමුවුවහොත් දිනක, මව් පදවියට බයේ
නොකියනු මැනවි කිරි එරුනා කියල ළයේ
පොඩි කල පටන් හිටියෙමි මඩමකට වෙලා
එහෙ සිටි ලමයි මට හරියට විහිලු කලා
අසරණ කමට කඳුලැල් යන විටදි ගලා
පැනලයි ආවෙ ඉන් එක කොල්ලෙකුට තලා
කලු කොට එකා යැයි නිතරම කියනු ඇහේ
කොට්ටෝරුව කියයි හිඟමන් යදින රැහේ
ඇහුනම ඒව කඳුලින් ඇස් දෙකම වැහේ
කැත කොල්ලෙකුට මම විතරද හිටියෙ එහේ
දවසක දවල් දානෙට දීසියක දමා
තිබු ජෙලි ටිකක් අරගෙන රස බැලුව තමා
කල ඒ වැරැද්දට ඉල්ලූ නමුදු සමා
නෝනා තැලුවෙ මට අතැඟිලි පිටට නමා
කලිසම් කමිස අපි ලඟ වැඩිපුර නෑනේ
දවසක සෙල්ලමෙදි කලිසම ඉරුනානේ
ඔච්චම් කරද්දිත් කොල්ලන් එක රෑනේ
පොඩි කලිසමක් වත් දුන්නද අඩු ගානේ
මගෙ වයසෙම උනත් ඒ අය හරිම වසයි
හිටියොත් පාඩුවෙි දුවවිත් පිටට ගසයි
බොරුවට ඇඟෙව්වෙි ඒවා රිදුනු ලෙසයි
රිදිලා නෙමෙයි ඇඬුවෙි දුක හිතුනු නිසයි
කවදත් අපිට එහෙ දහවල අවිවෙිකයි
සෙල්ලම් කලෙත් හවසට සමහර දාකයි
අපි පොඩි අයයි එහෙ නෝනල හරි නාකයි
හිටියම මඩමෙ අත්වෙන ඉරණම ඔිකයි
දුක සහ රිදුම් සිතිවිලි එහෙ මෙහෙ පීනයි
වැඩිපුර රිදෙව්වෙි මඩමෙි කොලු රෑනයි
සමහරදාට නින්දක් ඇති නැති ගානයි
දුටුවෙම නුඹ තුරුල්ලේ නිදියන හීනයි
අවුරුද්දෙන්ලු මා එතැනට දමල ගියේ
දැන් අවුරුදු අටයි නෝනා කියල තියේ
නොඇසුවෙ අම්ම ගැන, ගහවිද කියල බයේ
මඩමට දමද්දිත් දුක නොතිබුනිද ළයේ
කවදා හරිම පුතු සොයමින් පැමිණි දින
හිඟනා කිව්ව ලමයින් බය කරන මෙන
නොකියන ලෙසින් ඒ ලෙස දරුවෙකුට වෙන
චුට්ටක් බැනල චුට්ටක් සැර කරනු මැන
රුවින් පමුදිත යද්දෙහිආරච්චි
2021.03.21
No comments:
Post a Comment