Friday, May 21, 2021

තවත් එක් මිලිටරි කතාවක් නොවෙි



ලෝකයේ මිනිස්කම මිය ඇදෙමින් තිබෙි. මිනිසා යන සත්ත්වයා මෙි පෘතුවි ගෝලයට බිහිවූ මොහොතේ පටන්  මිනිසා නැතිවී යාමෙි ආරම්භයත් ඇරඹුනි. ඒ  "යමක නැතිවීම ආරම්භ වන්නේ එය ඇතිවූ මොහොතෙනි" යන සනාතන දහම සත්‍ය කරවමිනි. මිනිසා තවත් කාලයක් මෙි ලෝකයේ ජීවත් වෙනු ඇත. නමුත් මිනිසා ගල්යුගයෙන් පසු අද සිටින තත්ත්වයට පත්ව ඇත්තේ අහම්බයකින්නම් නොවෙි. ආදි මිනිසා විසූ මධ්‍යතන යුගයෙත්  සොහොන් භාවිතාව ඉහල මට්ටමක තිබුනිනම් ඔවුන්ගේ ගුණ දහම්ද ඒ තරමටම දියුණු නැතැයි කිව හැක්කේ කා හටද?. මිනිසා පරිනාමය වෙමින් ආ ගමනේදී මෙි දක්වා ගුණ දහම්ද පරිනාමය වී අද පවතින තත්ත්වයට පත්ව  තිබෙි. එය අදින් මෙතෙකින් නවතින්නේ නැත. තව තවත් පරිනාමය වෙි. මිනිසා තුත්තිරි ගස් සෙවනේ විවෙිකය ගත කරන කාලයක් පැමිණේ. ඒ තරමටම මිනිස් ගුණයද හීන වෙි. නමුත් තාමත් මිනිස්කම මිහිතලයෙන් අතු ගෑවී නැත. එබැවිනි ඉඳ හිට හෝ තැනකින් මෙි ලෝකයේ මිනිසත් කමින් පරිපූර්ණ මිනිසුන් එකෙකු හෝ කිහිප දෙනෙකු බිහිවෙන්නේ. නූතන තාක්ෂණයට (MODERN TECHNOLOGY ) අනුව මිනිසාට සියලු දේ පහසු කරවන නවතම සොයා ගැනීම් කර ඇත්තේ ඉතාම ස්වල්පයකි. සොයාගැනීමට හෝ නිපදවීමට තවත් බොහෝ දේ ඇත. ඒවා සියල්ලෙහි බිහිවීමත් සමග මෙි මන්දාකිණියේ අවසාන මොහොතත් ලඟාවෙනු ඇත. 


නූතන ලෝකයේ රටවල් අතර බල අරගලයක් බිහිව තිබෙි. එයට ආසන්නතම සහ වත්මන් උදාහරණය ලෙස ඊශ්‍රායලය හා පලස්තීනය දැක්විය හැකිය. කිසිම රටක් ජාතියක් තවත් රටකට ජාතියකට නොදෙවෙනි වීමට ඇති අකමැත්ත මත එය මොහොතෙන් මොහොත දරුණුවනු ඇත. ඒ ඒ රටවල මිනිසුන් විනාශ භාවයටද පත්වනු ඇත. නමුත් තමන්ගේම මතයේ එල්බගෙන සිටින නායකයින් තම අරමුණු උදෙසා මිසක් තමන්ගේ හෝ තවත් මිනිස් කොට්ඨාශයක් හෝ කොට්ඨාශයන් කෙරෙහි අවධානය නොදක්වනු ඇත. එයින්ම මෙි සූර්‍යග්‍රහ මණ්ඩලයේ ජීවින් බිහිව සිටීම අතින් හුදෙකලා ලෝකයක් ලෙස පෘතුවියද දිනක විනාශ වී යනු ඇත. එහෙත් එවැනි " මිනිසාගේ මිනිස් සතුරන්" නැවැත්වීමට ⁣ඊට වඩා බලවත් යුග පුරුෂයෙකු මෙි ලෝකයේම තැනකින් බිහිවනු ඇත. ඒවාට විරුද්ධව හඬ නගනු ඇත. ඒවා වළක්වා ඔවුන්ව විනාශ කරනු ඇත. ලෝකය බෙිරා ගනු ඇත. නැවත සාම කාලයක් ඇරඹී දසරාජ ධර්මයෙන් ලෝකය පාලනය කරනු ඇත. මෙි එවැනි කතාවක් නූනත්, තමන්ට හැකි පරිදි මිනිසාට විරුද්ධව නැගී සිටින මිනිස් සතුරෙකුට එරෙහිව නැගී සිට,  මෙි ලෝකය වෙනුවෙන් යමක් කර සතුටින් මියගිය මිනිසෙක් පිළිබඳවයි. මෙි ඔහු වෙනුවෙන් රෝස මල් මිටකි. 


ඔහු උපත ලබන්නේ මොරොක්කෝවෙිදී දුගී දුප්පත් පවුලකයි. අනන්තවත් අඟහිඟතා අතුරින් නමුත්, සතුටින් ජීවත් වන පවුලක එකම දරුවා වූ ඔහු පාසැල් අධ්‍යාපනයක් ලබන්නේ නැත. ඒ වෙනුවට ඔහුට උරුම වෙන්නේ බැටළුවන්, ගවයන්, ආදී සතුන් බලාගැනීමෙි පියාගේ උරුමයෙන් ලැබෙන රැකියාවයි. නමුත් යන්තම් ලිවිමෙි කියවීමෙි හැකියාවක් ඇති පියා වැලි පියසිවල තම එකම දරුවාට අකුරු හුරු කරවන්නේ බස් එකක බෝඩ් එකක්, බෙහෙත් තුංඩුවක් හෝ කියවාගත හැකි පරිද්දෙන් දැනුමක් ලබා දීමටයි. නමුත් තම පියාගේ දහඩිය සුවඳට වඩාත් ඇළුම් කරන ඔහු පියාගේ සෑම වචනයක් අකුරක්ම සිතේ දැඩිව ධාරණය කරගනු ලබන්නේ, දිනක  "කවදා හරි මෙි ලෝකය වෙනස් කරමි. මගෙන් මතු දරුවනට වැලි පියසිවල අකුරු කරවන යුගය නැති කර දමමි" යන ඒකායන බලාපොරොත්තුවෙන් යුතුවයි. සතුන් බලාගැනීමෙන් ලැබෙනා හැම සතයෙන්ම පොත් පත්තර කියවීමට මිලදී ගන්නේ ඔහුගේම සැලසුමකට අනුවයි. ඔහුට ඉගෙනීම තරම් ප්‍රිය විෂයයක් මෙි මිහිතලය මත නොතිබිනි.

කාලය වියැකින. ඔහු ක්‍රම ක්‍රමයෙන් ඉගෙන ගෙන විශ්ව විද්‍යාලයකට ඇතුළු විය. ඒ සඳහා ඔිනෑවටත් වඩා සුදුසුකම් ඔහු ස්වඋත්සාහයෙන් ඇති කර ගෙන තිබුනි. ⁣මුල් යුගයේ පටන්ම ඔහුගේ නවාතැන වන්නේ එක්සත් ජාතීන්ගේ සංවිධානය විසින් ඉදිකල ගමෙි එකම පුස්තකාලයයි. ලෝකය වෙනස් කිරීමෙි තරමටම නූනත් ඒ සඳහා නිසි පන්නරයක් විශ්ව විද්‍යාලයෙන් ඔහුට ලැබිණි. නායකත්ව ගුනාංග ඔහුගෙන් මොනවට පැහැදිලි විය. සරසවියෙන් පිටවීමත් සමග හමුදාවට බැඳෙන ඔහු තරු දෙකක කපිතාන් වරයෙකි. කඳවුරේ ඔහුගේ කාමරය පුරා අලවා තිබුනේ අඩ නිරුවත් කෙල්ලන්ගේ පින්තූර වෙනුවට ජෙනරාල් කොලින් පවෙල්,AK 47 අවිය නිපදවූ රුසියානු ගොවිපවුලේ 17වැනි දරුවා වූ මෙිජර් ජනරාල් මිහායල් කැලැස්නීකොෆ්,ෆීල්ඩ් මාර්ෂල් සාමි මණික්ෂෝ,ෆීල්ඩ් මාර්ෂල් අර්වින් රොමෙල්,මාර්ෂල් ෂුකෝෆ් සහ තවත් හමුදා ප්‍රධානීන්ගේ පිංතූර විය. ඒ තමන්ගේ ගමනට තෝරාගත් විෂය පථයට අදාල රට රටවල ශ්‍රේෂ්ඨ හමුදා නායකයින්ගේය. හොඳ වෙලාවට එකල ෆීල්ඩ් මාර්ෂල් සරත් ෆොන්සේකා නොසිටියේය. සිටියානම් ඔහුගෙත් පින්තූරයක් ඒ අතර අලවා සීයට තුනකගෙන් කුණුහබ්බ අසන්නට ඉඩ තිබුනි. එහෙත් තමාත් කවදා හෝ ඔවුන් පත්වූ තත්ත්වයට පත් වෙියැයි අද කතානායකයාද නොදැන සිටින්නට ඇත. අවාසනාවට මුලින්ම ඔහුට මුහුන දීමට සිදුවන්නේ මුස්ලිම් ත්‍රස්ථවාදයට විරුද්ධවයි.


 පුහුණුවෙන් පසු ඔහුව මුස්ලිම් ත්‍රස්ථවාදීන් ගහණ නගරයකට පළමු රාජකාරිය සඳහා කැඳවීය. ඒ තම රටෙි ප්‍රධාන නගරයකට එල්ලවූ ප්‍රහාරයක් හේතුවෙනි. ඒ ඔහුගේ පළමු යුධ අත්දැකීම වන අතර ඊට සීමිත භඨ පිරිසක් පමණක් සහභාගි විය. කුඩා කණ්ඩායමක් සමග සතුරාගේ භූමියට ඇතුල්වී නගරබද,කැලෑ බද මෙන්ම කාන්තාරයේද ඔහුට සටන් කරන්නට සිදුවිය. පළමු අත්දැකීමෙන්ම ඔහුගේ නායකත්වයෙන් යුත් භඨ පිරිස් ජයග්‍රහණය ලබා ගත් අතර,  නිතර නිතර එවැනි කුඩා කණ්ඩායම් සමග සතුරු භූමියට ඇතුල්වී විශ්මය ජනක ප්‍රහාර එල්ල කොට ඔවුන් පොදි පිටින් මරා දමන්නට ඔහුට සිදුවිය. වරෙක බරපතල ලෙස සටනකදී තුවාල ලබන ඔහු ඒ තුවාල සුවවීමත් සමග නිළ උසස්වීමක්ද ලබා නැවත සටන් බිමට පැමිණියේය. එසේ පියවරෙන් පියවර ඉහලට ආ ඔහු සහභාගිවූ සටන් එසේ මෙසේ ඒවා නොවෙි.  යුධ සැලසුම් අතින් එදා මෙදා තුර ලෝකයේ බිහිවූ "ක්ලෝස්විට්ස්"ගේ  "සතුරාට රිංගීමට කිසි ඉඩක් නැති" වැනි යුධ සැලසුම් සකස් කරමින් ඔහු සතුරන් හඹා ගියේය. පහර පිට පහර දීය. ඉන් ත්‍රස්ථවාදී සමාජයේ මහත් කැළඹීමක් ඇති කරවන්නට පවා ඔහු සමත්වීය. 


වරෙක මොවුන් ඉතා රහසේ තම නගරයට රිංගා සිටින බැව් දැනගත් ත්‍රස්ථවාදීහු ඒ නගරයේම කොටසක් ප්‍රාන ඇපයට ගත්හ. මීට පෙරද මෙම නගරයේ ඇතිවූ සටනකින් සුනු විසුනුව ගිය ගොඩනැගිලි පවා අලුත්වැඩියා කිරීමට පෙර නැවත වරක් එම නගරයටම ඇතුල්වූ මොහු හා සගයන් මතුවන්නේ උමගකිනි. ඒ සටන්කාමීන් විසින්ම සැඟවීමට භාවිතාකල උමගකි. ඒ උමග තුල සටන සැලසුම් කරමින් එක්වරම මතුවූ ඔවුහු සැඟවී පහරදීමෙි කලාව අනුගමනය කලහ. ඉන් යම් හානියකට පත් සටන්කාමීන් ප්‍රාන ඇපයට ගත් මිනිසුන් තිදෙනෙකු මරා ප්‍රදර්ශණය කර හමුදා සාමාජිකයන්ට යටත් වීමට අණ කලේය. එහෙත් යටත්වීමක් ගැන සිතිවිල්ලක් පවා නොදන්නා ඔවුන් ඉතා සංකිර්ණ එහෙත් භයංකාර සටනකට මුල පිරීය. එහි අවසානයවූයේ ඒ නගරයේ සිටි බොහොමයක් සටන්කාමීන් මරාදමා ප්‍රාණ ඇපකරුවන් නිරුපද්‍රිතව බෙිරා ගැනීමයි. පැරදුණු සටන්කාමීහු පළා යන්නට පටන් ගත් විගස මොවුන්ද හඹාගොස් ප්‍රහාර එල්ල කරන්නට විය. ඉන් පළා ගිය සටන්කාමීහුද සමූලඝාතන යකින් අවසන් කිරීමට ඔහුට හැකිවිය. ගුවනින් කිසිදු සහයක් නොලබා කාන්තාරයකදී දින දෙකක් පුරා කල දරුණු සටනකදී ඔහු නැවත වරක් සුළු තුවාල ලැබුවෙිය. ස්වාභාවික දුහුවිලි කුණාටු මැද  නමුත්, එහි සිටි සටන්කාමීන් එකිනෙකා මරා දමමින් ඔවුන්ට භීතිය දනවා එතනිනුත් පලවා හරින්නට මොහු හා සගයින් සමත්විය. ඉන් තමාගේ භඨ පිරිසෙන් හරි අඩක් ඔහුට අහිමිවිය. නමුත් නියම වීරයෙකුට නිවැරදි සැළසුමක් ඇත්තේනම් භඨ පිරිස් ඌනතාවය ගැටළුවක් නොවෙි. එය මනාවට ඔප්පුකල ඔහු අඩු සම්පත් වලින් උපරිම ප්‍රයෝජනය ගන්නට විය. 


වරෙක ඔහු සිටි අණුකණ්ඩයට කඩාවදින විශාල සටන් කාමීන් පිරිසක් මොවුන්ට දැඩි ප්‍රහාර එල්ල කරන්නට විය. අවාසනාවකට එයට මුහුන දීමට  ඇති තරම් භඨ පිරිසක් සිටියත් ඒ සියල්ලෝම මොහු වාගේ දක්ෂයින් නොවීය. දක්ෂයා සතුරාට කොටුවූවත් ඔහුගේ සටන ජයග්‍රාහීය. දින එක හමාරක කාලයක් තිස්සේ ඒ බැව් ඉතා හොඳින් ඔප්පු කරමින් වරින් වර විස්මය ජනක ප්‍රහාර එල්ලකරමින් මෙි හිතුවක්කාරී සටන්කාමීහු මට්ටු කරන්නට ඔහු උත්සාහ ගත්තේය. සටන දිග් ගැස්සින. ඔහු සිටි ගොඩනැගිල්ලට මරාගෙන මැරෙන ප්‍රහාරයක් එල්ල විය. ඉන් මොහුගේ දක්ෂයින් කිහිප දෙනෙකුම මරුමුවට පත්විය. සමහරක් බරපතල තුවාල ලැබීය. නමුත් සටන පැවැත්විණ. බළකොටුවට ඇතුලුවූ සටන්කාමීන් මොහු සොයා බළ කඳවුරම පීරන්නට විය. එයින් උද්දාමයට පත් සටන් කාමීන් තමාගේ විනාශ මුඛයම එය බැව් තේරුම් නොගන්නට තරම් මූඪ විය. දක්ෂයාට තැනක් නොතැනක් නැත. ඉතිරි භඨ පිරිස්ගෙන් ප්‍රථිසංවිධානයවූ ඔවුන් සතුරා එන තැන්වල රැකවල් ලා සිටියේය. ප්‍රහාර එල්ල කලහ. නමුත් සටන දිග්ගැස්සුනා විනා දෙපාර්ශ්වයම සටන අත්හරින්නට සූදානම් නැත. 


සටන්කාමීන්ට සහය සඳහා තවත් පිරිස් ඇදී එන්නටවිය. නොසිතූ ලෙස සටන්කාමීන්ගේ පිරිස් බලය වැඩිවී ප්‍රහාර දැඩිවන්නට විය. ඉතිරිවී ඇති සීමිත භඨ පිරිස් නිර්භය ලෙස හසුරවන්නට කුමන තත්වයේ සිටියත් ඔහුට හැකිවිය. මෙි වන විට අතිරේක භඨ පිරිස් මොහුට සහාය සඳහා පැමිණෙන්නට විය. ඔවුන්ට මඟදීම මරාගෙන මැරෙන ප්‍රහාර එල්ලවූවත්, ඉන් නොනැවතුනත්, පැමිණීමෙි වෙිගය අඩාලවිය. ඒ වන විට සටන්කාමීන්ට මුහුණ දීගත නොහී උහුහු ගොඩනැගිල්ලේ සඳලුතලය කරා පැමිණ එක් එක් සතුරා ඉලක්ක කර එකා දෙන්නා මරා දමන්නට විය. ඒ වනම තව මොහොතකින් ගුවන් ප්‍රහාරයක්  එල්ලවීමට නියමිත බැවි සටන්කාමීන්ට දැනෙන්නට විය. ඒ නිදහස් අහස්තලය කාර්‍යබහුල කරමින් පියාසර කල එම්අයි 24 ප්‍රහාරක යානා දෙකක් පැමිණෙන ශබ්දය නිසාවෙනි. එයින් කලබලයට පත් සතුරන්, සිටි සිටි තැන්වලින් පසුබා එලියට පැමිණ සැඟවෙන්නට උත්සාහ කලේය. වැලි කඳු ආවරණය කරමින් ස්ථානගත කර තිබූ මෝටාර් ප්‍රහාරකයන් ඒවාද දමා හිස් ලූ ලූ අත දුවන්නට විය. එහෙත් ගුවනේ සිට ඉලක්කපත් සියල්ල පැහැදිලිව දුටු නියමුවන් තමන් රැගෙන ආ බෝම්බ එකිනෙක ඔවුන් ඉලක්ක කර නිදහස් කරන්නට වූයෙන්, එ සමග ඔවුන්ට දරුණු ප්‍රහාරයක් එල්ල කලේය. සීසීකඩ සටන්කාමින් මැරී වැටෙන්නට විය. එයින් තවත් ශක්තිමත්වුනු කතානායකයා සිටි තැනින් නැගිට දුවන සටන්කාමීන්ට ප්‍රහාර එල්ල කර ඔවුන්ද මරා දමන්නට විය. 


නමුත් වෙිලාව පැමිණි විට කොයි මිනිසාත් යා යුතුය. එය නියදමකි. මුස්ලිම් සටන්කාමීන්ගේ සමාජයම භීතියට පත්කරවමින්ද වරෙක සමූල ඝාතනය කරමින්ද, ඔවුන්ගේ කඳවුරුවලට කඩා පනිමින් මුරුගසන් වරුෂාවක් මෙන් වෙඩි උණ්ඩ සී සී කඩ වස්සවා ඔවුන් ඝාතනය කරමින්ද, තමන්ගේ අයට ආදරණීය නායකයකු වූ ඔහු ඈත ගල්කුලක මුවාවී සිටි සැඟවුන වෙඩික්කරුවෙකුගේ උණ්ඩයකට බිලිවිය. සටනේ අවසානය දැක දැකත් එසේ වා තලයට තම හුස්ම පොද එක්කල ඔහු වෙනකෙකු නොව නම කී පමණින් මුළු ලොවම හඳුනන උප කර්නල් ස්ට්‍රින් ග්‍රේය. සටන්කාමින් රැසකට මරණය ගෙනා ඔහු සටන්කාමියෙකුගේම වෙඩි උණ්ඩයට බිලිවී මහ පොලොව සිපගත්තේ එය දකින කාගේත් දෙනෙතට කඳුළක් එක්කරමිනි. එතෙකින් "හිංදි ඩබොඩ් පුල් ඇක්සන් මූවි එච්ඩී -2020 නිමාවට පත්විය. 


රුවින් පමුදිත යද්දෙහිආරච්චි

2021.05.21

No comments:

Post a Comment